མདུན་ཤོག །

མཛད་རིམ་དང་གསར་འགྱུར།

        མགོན་པོའི་བསང་གསོལ།

　

        ཕྱི་ལོ་ 2010 ཟླ་ 12 ཚེས་ 9 ཉིན་ཡོངས་དགེ་གཏེར་སྒར་དགོན་གྱི་ཉེ་འདབས་གསུང་ཆོས་རྭ་བའི་དབུ་གུར་ནང་ཞོགས་པ་ཆུ་ཚོད་ 5 པའི་ཐོག་

        ༧དཔལ་རྒྱལ་བའི་དབང་པོ་ཀརྨ་པ་མཆོག་ནས་ཚོགས་མགོན་མཛད་དེ་མགོན་པོའི་བསང་གསོལ་རྒྱས་པ་ཚུགས། ཚོགས་ཞུགས་སུ་སྐྱབས་རྗེ་འཇམ་

        མགོན་རིན་པོ་ཆེ། སྐྱབས་རྗེ་རྒྱལ་ཚབ་རིན་པོ་ཆེ། མཁན་ཆེན་ཁྲ་འགུ་རིན་པོ་ཆེ། རྡོར་སློབ་བསྟན་དགའ་རིན་པོ་ཆེ། ཡོངས་དགེ་མི་འགྱུར་རིན་པོ་ཆེ།

        མཁན་པོ་བློ་གྲོས་དོན་ཡོད། བག་ཡོད་རིན་པོ་ཆེ་སོགས་བླ་སྤྲུལ་ཆེ་ཁག་རྣམས་དང་། གཞན་ཡང་བཤད་གྲྭ་ཁག་གི་མཁན་པོ་དང་སྒྲུབ་གྲྭ་ཟིན་པའི་

        སྒྲུབ་བླ་རྣམ་པ་སོགས་དགེ་འདུན་འདུས་པ་ 5000 ལ་ཉེ་བ་འདུས་ཡོད་པ་དང་། དེ་བཞིན་རང་གཞུང་གི་བཀའ་བློན་དང་སྤྱི་ཟུར། སྤྱི་འཐུས་ལས་

        ཐོག་པ་འགའ་ཞིག་ཀྱང་ཚོགས་སུ་ཕེབས་ཡོད།

                                                              དེ་ཉིན་༧རྒྱལ་དབང་མཆོག་ནས་བཀའ་སྩལ་དོན་དུ། དེ་རིང་གསུང་ཚོགས་ཀྱི་ཡི་དམ་གཙོ་བོ་

        མ་ཧྭ་ཀ་ལ་ཡིན་ཅིང་། མ་ཧྭ་ཀ་ལའི་ལོ་རྒྱུས་རྒྱབ་ལྗོངས་སུ་དཔྱད་སྐབས་དེ་ཉིད་ཐོག་མ་ནས་ཀཾ་ཚང་དང་ཐུན་མོང་མ་ཡིན་པའི་འབྲེལ་བ་ཡོད་

        པའི་ལྷ་ཞིག་ཡིན་པས། དགུ་བརྒྱའི་དུས་དྲན་ལ་མགོན་པོ་དང་འབྲེལ་བའི་མཛད་རིམ་གོ་སྒྲིག་བྱ་རྒྱུ་འདི་བཞིན་ཡི་དམ་མགོན་པོའི་བཀའ་དྲིན་

        རྗེས་དྲན་མཚོན་བྱེད་ཕྱིར་ཡིན་ཚུལ་གསུངས།

　

　

        གཞན་ཡང་ཚོགས་ལ་ཕེབས་པའི་འདུས་པ་ཡོངས་ལ་༧རྒྱལ་དབང་མཆོག་ནས་རེ་སྐུལ་གནང་དོན་ལ། དགེ་འདུན་ནང་ཕན་ཚུན་ཐུགས་མཐུན་

        ཁྲིམས་གཙང་ཡོང་བ་དང་། ལྷག་པར་བླ་སློབ་དབར་ཐུགས་མཐུན་དམ་གཙང་ཡོང་དགོས་པ་ཤིན་ཏུ་གནད་ཆེ་བ་དང་། བསྟན་པ་འཛིན་པའི་

        བླ་མ་ཡང་མིང་དང་དགོན་པ་ཆེན་པོ་ཡོད་པ་ཙམ་གྱིས་ཆེན་པོ་དང་ལུང་རྟོགས་ཀྱིས་ཡོན་ཏན་མི་འབྱུང་བར་བློ་ཆོས་སུ་སོང་ཞིང་རང་སེམས་

        ཞི་དུལ་བག་ཡོད་བྱ་རྒྱུ་གལ་ཆེ་བ་དང་། ཁྱད་པར་རང་རེ་བཀའ་བརྒྱུད་པ་རྣམས་སྒྲུབ་བརྒྱུད་ཉམས་ལེན་པའི་བརྒྱུད་པ་ཡིན་སྟབས། བློ་ཆོས་

        དང་མཐུན་ཞིང་རྒྱུན་དུ་ཀུན་སློང་བཟང་པོའི་ལག་ལེན་བྱ་རྒྱུ་ཤིན་ཏུ་གཅེས་ཤིང་། ལག་ཏུ་དཔེ་ཆ་མེད་ཀྱང་གཙོ་བོ་ཀུན་སློང་བཟང་པོ་ཞིག་

        མཆིས་ཚེ་དེ་ཀས་ཆོག་པས་དེ་དོན་ཡོང་ཐབས་ལ་སྙིང་ནས་འབད་དགོས་པ་དང་།

                             སྙིགས་བདོའི་དུས་མཐའ་འདི་ཉིད་ལ་གཙོ་བོ་ངེས་འབྱུང་གི་སྐྱོ་ཤས་དྲག་པོ་དགོས་རྒྱུ་ཧ་ཅང་གལ་འགངས་ཆེ་བ་དང་།

        རང་རེ་རྣམས་སྤྱིར་ལྔ་བརྒྱའི་དུས་མཐར་སྐྱེས་པ་ཞིག་ཡིན་ཀྱང་རྒྱལ་བའི་ལུང་རྟོགས་ཀྱི་བསྟན་པ་འཇིག་རྟེན་གྱི་ཁམས་སུ་བཞུགས་ཡོད་པ་

        དང་། སྒྲུབ་བརྒྱུད་ཀྱི་རིང་ལུགས་དྲི་མ་མེད་པ་འདི་ལྟ་བུ་དང་མཇལ་དུ་ཡོད་པ་འདི་སྐལ་བ་དང་ལྡན་པ་ཞིག་ཀྱང་ཡིན་པས་རིང་ལུགས་འདི་ 

        བཞིན་རྟག་ཏུ་གཅེས་འཛིན་གྱིས་མུ་མཐུད་རྒྱལ་བསྟན་ཡུན་དུ་གནས་ཐབས་ལ་ཀུན་གྱིས་འབད་དགོས་ཞེས་བཀའ་སྩལ་བ་དང་།

        བཀའ་སློབ་གྲུབ་རྗེས་བླ་སྤྲུལ་དགེ་འདུན་འདུས་པ་རྒྱ་མཚོས་བསང་གསོལ་དབུ་འཛུགས་བསྐྱངས་ཏེ་ཆུ་ཚོད་ 9:40am  ཐོག་གསུང་ཚོགས་

        གྲོལ་བའི་མཛད་རིམ་སྙིང་བསྡུས་སུ།