༧སྐྱབས་རྗེ་གཽ་ཤྲཱི་རྒྱལ་ཚབ་རིན་པོ་ཆེས་སྩལ་བའི་ཤིས་བརྗོད།

  ༄༅། །བསྐལ་བཟང་སངས་རྒྱས་དྲུག་པ་ཆོས་རྗེ་དུས་གསུམ་མཁྱེན་པའི་

དགུ་བརྒྱའི་དུས་དྲན་ལ་ཆེད་དུ་བརྗོད་པ་མངོན་པར་

དགའ་བའི་སྒྲ་དབྱངས་ཞེས་བྱ་བ་

བཞུགས་སོ། །

ཨོཾ་སྭསྟི་བི་ཛཱ་ཡནྟུ། །

སྣ་ཚོགས་འོད་དང་གྲགས་སྙན་འབྱུང་བའི་གནས། །

རིན་ཆེན་འཛིན་མ་ཟླུམ་པོར་འཁྱིལ་བ་ན། །

ཤཱཀྱའི་གཙོ་དང་སྤྱན་རས་གཟིགས་དབང་སོགས། །

བདེ་གཤེགས་རྒྱལ་བ་སྲས་དང་བཅས་རྣམས་ཀྱི། །

　

ཐུགས་རྗེ་ཚད་མེད་མཁྱེན་པ་ལྷུན་གྲུབ་པའི། །

ཕྲིན་ལས་བདག་ཉིད་མི་བསྐྱོད་རང་བཞིན་གྱི། །

མཐོན་ཀའི་འོད་ཕྲེང་འཕྲོ་བའི་ཅོད་པན་ཅན། །

དུས་གསུམ་ཆོས་ཀྱི་རྣམ་པ་ཀུན་མཁྱེན་པ། །

　

ཀརྨ་ཀ་ཞེས་མཚན་མཆོག་ཡི་གེའི་སྤྲིན། །

ཞིང་ཁམས་རྒྱ་མཚོའི་ཀློང་ན་གསལ་དེ་ཡི། །

ངོ་མཚར་མཛད་པ་མི་ཟད་སྲིད་པའི་མཐར། །

རིགས་དྲུག་འགྲོ་བའི་མགོན་དུ་སྣང་བ་ནི། །

　

ལྷག་པའི་བསམ་པ་བྱང་ཆུབ་སེམས་ལྡན་གྱི། །

བློ་གྲོས་རྣམ་པར་དཀར་བས་རྗེས་དྲན་པའི། །

ཟླ་བའི་ཕུང་པོ་བརྒྱ་ཕྲག་དགུ་བརྩེགས་པ། །

ཕུན་སུམ་ཚོགས་ལྡན་དུས་ཀྱི་བཀོད་པ་གང། །

　

མཆོག་གི་སྤྲུལ་པའི་ཉིན་བྱེད་བཅུ་བདུན་པས། །

འཇིག་རྟེན་དག་པའི་ངང་ཚུལ་རྒྱས་པའི་ཕྱིར། །

མ་ག་དྷ་ཡི་བྱང་ཆུབ་ཤིང་དབང་དྲུང་། །

ངོ་མཚར་མཛད་པ་མཆོག་ཏུ་བསྟན་པ་འདིར། །

　

         རྫོགས་སངས་རྒྱས་དང་བྱང་ཆུབ་སེམས་རྣམས་དང་། །

         དགྲ་བཅོམ་གནས་བརྟན་དམ་ཅན་རྒྱ་མཚོ་ཡིས། །

         གསུང་དབྱངས་དྲི་བསུང་མདངས་ལྡན་མེ་ཏོག་ཆར། །

         ནམ་མཁའི་མུ་ཁྱུད་གང་བས་ཤིས་མཛད་ཅིང་། །

　

གཙང་གནས་ལྷ་དང་ཚངས་དབང་མིག་སྟོང་ཅན། །

གནོད་སྦྱིན་དྲི་ཟ་གདེངས་ཅན་གཙོ་རྣམས་ཀྱིས། །

གླུ་དབྱངས་རྣམ་མང་རོལ་མོས་མངོན་བསྟོད་ནས། །

གུས་བཅས་དགའ་བས་བསྐྱོད་ཅིང་ཕྱག་བྱར་གྱུར། །

　

       འདི་ལྟར་མཛད་པ་དགེ་བའི་ཚོགས་ཆེན་གྱིས། །

       བྷཱ་ར་ཏ་ཡི་ས་གཞི་སྐྱོང་བ་ཡི། །

       ལུགས་གཉིས་གཟི་བརྗིད་མཐོན་པོར་གདེངས་གྱུར་པས། །

       ཕྱོགས་མཚམས་རྣམ་པར་གནོན་པའི་དབང་ཐོབ་ཅིང་། །

　

གསེར་ལྡན་གླིང་ཆེན་དྲུག་ལ་ལོངས་སྤྱོད་པའི། །

མཐོ་རིས་མཆོག་དང་ངན་འགྲོའི་གཟུགས་ཅན་གྱི། །

ལུས་ཅན་ཇི་སྙེད་འདོད་པའི་ཡོན་ཏན་དང་། །

ཞི་བའི་སེམས་དང་རྣམ་དྲུག་འབྱོར་པ་རྒྱས། །

　

          རྣམ་བཅུའི་དགེ་བ་ཏིང་འཛིན་ཚད་མེད་བཞི། །

          བསམ་གཏན་བདེ་ལ་ངལ་གསོས་རྟག་འཚོ་ཞིང་། །

          ཕས་རྒོལ་ཟུག་རྔུས་གཙེས་པའི་སྐབས་མེད་པར། །

          ཐར་པ་མཆོག་ལ་རིངས་པར་འཇུག་གྱུར་ཅིག །

　

རྒྱལ་ཀུན་ཐུགས་རྗེའི་སྒྱུ་འཕྲུལ་སྣང་བའི་གར། །

སྲིད་ཞིའི་དགེ་དང་བདེ་ལེགས་འབྱུང་བའི་གནས། །

སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། །

གསང་གསུམ་རྒྱལ་བ་ཚེ་མཐའ་ཡས་པ་དང་། །

　

           གཉིས་མེད་བསྐལ་པ་བྱེ་བ་རྒྱ་མཚོའི་བར། །

           རབ་ཏུ་བརྟན་པས་བཞེད་དོན་ཀུན་གྲུབ་པ། །

           ང་ལས་ནུ་བཞིན་ལྷ་མིའི་འཇིག་རྟེན་ཀུན། །

           རྣམ་པར་གནོན་པའི་མཐུ་དབང་འཛིན་གྱུར་ཅིག །

　

འཇིག་རྟེན་འདྲེན་པ་རྒྱལ་དབང་ཀརྨ་པའི། །

ཕྲིན་ལས་འོད་བརྒྱས་ས་གསུམ་ཀུན་ཁྱབ་ཅིང་། །

གདུལ་བྱའི་ཤེས་རབ་པདྨོའི་ཚོགས་རྒྱས་ཏེ། །

རྣམ་ཀུན་བཟང་པོའི་འདོད་དོན་ཡོངས་གྲུབ་ཤོག །

        དེ་སྐད་ཅེས་༧རྒྱལ་མཆོག་བཅུ་བདུན་པ་ཆེན་པོས་ཆོས་ཀྱི་རྗེ་དུས་གསུམ་མཁྱེན་པ་འཇིག་རྟེན་དུ་བྱོན་ནས་ཟླ་བའི་ཕུང་པོ་བརྒྱ་ཕྲག་དགུ་འདས་པའི་

        དུས་དྲན་དགའ་སྟོན་དང་བཅས་པ་རྒྱས་པར་མཛད་པའི་ཚེ་འཁོར་ལོའི་མགོན་པོ་མཆོག་གི་བཀའ་ལས་མི་འདའ་བའི་ཕྱིར་རྒྱལ་ཚབ་བཅུ་གཉིས་པས་

        ལེགས་པར་བརྩམས་པས་རྣམ་པ་ཀུན་ཏུ་དགེ་བའི་དགའ་སྟོན་རྒྱས་པར་གྱུར་ཅིག ། །། 2010/12/8 ཉིན།